才子蔡瀾逝世享年83歲 識飲識食瀟灑笑看人生
新加坡出生，長年於香港發展嘅才子 蔡瀾 早前離世，享年83歲。親屬極之低調處理後事。
蔡瀾近年曾多次傳出身體狀況欠佳消息，4月底就曾傳佢需於深切治療部留醫，唯之後佢發文指屬誤傳。年屆古稀嘅佢2023年曾跌傷，之後有指佢月花數十萬雇用多人團隊照顧自己生活所需。
蔡瀾一生經歷豐富，無論電影、美食、寫作都有研究，又被認為同 黃霑 倪匡 金庸 係香江四大才子，可惜滿腹墨水出口成篇嘅四人如今俱以作古。
蔡瀾 祖籍廣東潮州，家有一兄一姊一弟，長兄蔡丹曾任宣傳及電影發行，姊姊蔡亮曾任南洋女中校長，而3月逝世嘅弟弟蔡萱，曾任新加坡高級電視監製。
佢涉足嘅領域多到數唔清，年輕時期嘅蔡瀾因父親喺戲院任職，當時已同電影結下不解之緣。當時蔡家寓所就喺戲院三樓，佢就好似中咗戲癮咁，幾乎日日都喺戲院睇唔同電影。
蔡除咗著有多本著作之外，亦愛作畫，同樣亦自年少時產生興趣，佢曾指學校美術老師粉彩畫靚到爆，所以自己一得閒就去學，無形中就打下繪畫嘅基礎。再加上佢非常鍾意讀書，文化底蘊深厚，年僅14歲就曾喺《南洋商報》發表咗第一篇影評。
16歲時蔡瀾負笈日本，於日本大學電影科編導系學習。讀書期間仍經常到戲院睇戲，開闊眼光外亦積累唔少知識。當時佢更半工讀，負責安排電影到日本拍外景嘅工作。後來亦成為邵氏電影公司嘅駐日經理，專門購入日本電影到香港發行。
到1963年，22歲嘅蔡瀾就定居香港，擔任邵氏電影嘅制作經理。佢由雜務做起，先後學識制作、招聘攝影隊，而佢首部負責嘅影片就係《飛天女郎》。
佢曾提及當時嘅趣事，指拍攝王羽主演嘅經典作《獨臂刀》時冇雪景更臨近過年，為咗令工作人員可以早啲收爐返屋企，佢突然靈機一動以麵粉代替真雪，認真有辦法。
後來蔡瀾轉往嘉禾發展，老闆鄒文懷給予極大自由度發揮。佢就率領成龍、洪金寶同編劇陳景生，拍攝《快餐車》、《福星高照》同《龍兄虎弟》等大作。後來拍攝《重案組》時，因應九龍城寨拆遷，蔡瀾向政府申請於現場撼放數十部攝影機，以大量炸藥邊炸邊拍。後來佢又安排同日本合拍一系列由日漫改編特效片，好似《孔雀王子》、《阿修羅》等。
之後何冠昌離世，蔡瀾認為拍電影要建立個人風格之餘同時要犧牲好多人，覺得自己最鍾意嘅事反而成咗最唔鍾意嘅，於是就離開電影圈。
蔡瀾對美食一樣極有研究，於喺外地拍戲時，食勻各國美食，唔單止嘆知名貴價餐廳，仲會研究點解好食，平民美食佢一樣鍾愛，認為美味同價格並無關係。而佢踏入美食界亦係因為一次食飯經歷。一次蔡父來港一家人食飯，點知飯菜質素既差價錢又貴，服務員態度更欠佳，令佢一怒之下訴諸文字，結果之後就吸引無數報刊約稿。
佢曾為咗搵到最好雲吞麵，走遍港澳粵；為咗食到最好味嘅越南牛河，遠赴法美，最後於澳洲尋獲稱心滿意美味。蔡瀾早於SARS後，就極力主張香港應設置夜市生態，既吸引遊客亦有助低收入家庭發展，可惜當局未有積極回應。
早於20世紀80年代，蔡瀾就於倪匡介紹下認識金庸，金庸認為蔡瀾性格瀟灑，之後就安排佢喺《明報》撰寫專欄，欄名「草草不工」。後來佢亦喺唔同報章雜誌發表文章，內容包括日常瑣事、人生百態，極受讀者歡迎。佢講過寫作第一年稿費收入就有120萬。
唔少專欄文章曾結集出版，數十年來數量超過200本，佢仲同李碧華、亦舒齊名，係香港某圖書公司嘅三大「台柱」。 |
新浪微博
QQ空间
人人网
腾讯微博
Facebook
Google+
Plurk
Twitter
Line
