【官宣】維拉慘吞3蛋 謝拉特即時被炒

https://hk.on.cc/hk/bkn/cnt/spor ... 1021_00882_001.html



周五(21日)凌晨英超賽事，阿士東維拉作客慘吞富咸3蛋，開季11場聯賽輸第6場排喺尾4，當領隊謝拉特賽後受訪堅持「唔會放棄」，維拉隨即發出聲明宣布將佢炒魷，傳聞普捷天奴、杜曹都係維拉新帥目標。

維拉近期成績差勁，賽前已有傳今場係謝拉特「最後機會」，可惜球員唔爭氣，36分鐘被夏里遜列特攻陷。維拉中場杜格拉斯雷斯62分鐘用頭頂向阿歷山大米祖域，被球證用紅牌驅逐，踢少個嘅維拉6分鐘後再輸12碼，阿歷山大米祖域操刀射入，完場前7分鐘泰朗明斯擺烏龍，令維拉慘輸0比3。

謝拉特賽後已心知不妙，但就堅持無意辭職：「我明白依家個情況，但我係個戰士，永遠唔會自己放棄。」可惜維拉已決定將佢放棄，冇幾耐即發聲明將佢炒魷。謝拉特上年11月先至由格拉斯哥流浪加盟，原本目標係帶維拉出戰歐洲賽，但依家竟要為護級掙扎，謝拉特教唔夠1年就玩完。