8強抽籤-(歐冠+歐霸) 文傑講波經

歐聯8強周五晚(15日)進行抽籤，阿仙奴遇上德甲班霸拜仁慕尼黑，衞冕嘅曼城則連續3屆淘汰賽對上皇家馬德里，而且兩支英超球隊同線，如果雙雙晉級，將會在4強相遇。

拜仁慕尼黑可說是阿仙奴「剋星」，自2000年以來，雙方5次在淘汰賽相遇，阿仙奴都被對方淘汰出局，對上一次碰頭在2017年，兩回合都以1比5大敗，總比數輸2比10出局，而拜仁射手哈利卡尼效力熱刺多年，亦視阿仙奴為死敵；至於曼城同皇馬就係老對手，對上兩屆都在4強碰頭，各淘汰對手一次，獲勝一方最後都能奪冠。

至於另兩場對碰，馬體會對多蒙特實力相當，至於巴黎聖日耳門對巴塞隆拿，雙方主帥安歷基與沙維屬巴塞系同門師兄弟，將會正面對決。

歐聯8強首回合將於4月10日或11日凌晨舉行，次回合則於首回合一周後，4強首回合在5月1日或2日凌晨舉行，次回合於首回合一周後，今屆決賽將於6月2日凌晨假倫敦溫布萊球場上演。

歐聯8強抽籤結果：

上線
馬德里體育會 對 多蒙特

巴黎聖日耳門 對 巴塞隆拿

下線
阿仙奴 對 拜仁慕尼黑

皇家馬德里 對 曼城


周五（15日）晚歐霸8強進行抽籤，奪標熱門利物浦避開由「未來主帥」沙比阿朗素執教嘅利華古遜，與意甲嘅阿特蘭大狹路相逢，算係抽到好籤，而AC米蘭就同羅馬合演意甲內訌。

利物浦主帥高普早前宣布季尾離任，前紅軍中場、現時率領利華古遜喺德甲帶頭嘅沙比阿朗素，被視為接替高普嘅熱門人選，兩軍甚至有機會喺歐霸8強相遇。不過紅軍球迷暫時未有機會「睇辦」，因為利物浦喺8強抽到對阿特蘭大，而利華古遜則遭遇另一支英超球隊韋斯咸，由於呢兩場對決都分在不同線，「雙利」最快要喺決賽先會交鋒。

歐霸8強另一焦點，就係AC米蘭就同羅馬上演意甲內訌，兩軍近11次碰頭，A米取得8勝3和未輸過，擺明格食格，羅馬教頭迪羅斯要諗諗計，至於賓菲加則硬撼馬賽。歐霸8強首回合將於4月12日凌晨舉行，次回合則於首回合一周後，4強首回合在5月3日凌晨舉行，次回合於首回合一周後，今屆決賽將於5月23日凌晨假愛爾蘭都柏林上演。

歐霸8強抽籤結果：
上線
利物浦 對 阿特蘭大

賓菲加 對 馬賽

下線
AC米蘭 對 羅馬

利華古遜 對 韋斯咸