梁諾妍佗7個月完成10K 負重18磅上斜比較吃力

渣打香港馬拉松2024今晨喺16度氣溫下開跑，吳保錡以48分46秒完成10公里賽事，比上年快6分半鐘，佢用感動形容，同時歸功於亦師亦友嘅柳俊江：「今日跑呢段路就會諗起柳爺，同佢練跑好艱苦，佢好有紀律好熱誠，當初佢帶住我跑，改變我好多。」

Inez梁諾妍佗B 7個半月都參加10k，亦以1小時10分鐘輕鬆完成，佢話老公洪永城好支持，條件係背脊要掛個「CHILD IN CAR」警示字樣。反而冇話俾媽咪知。

「前亞視一姐」薛影儀同黃榕一齊參加10k，第一次參加渣馬嘅阿儀話嚟見識吓，仲話平時喺屋企樓下練跑成日俾街坊影，好煩咁喎！佢又話依家係自由身，暫時唔會同人簽約，講到收入就話係秘密。

「籃球女神」Mandy譚旻萱亦挑戰10k，賽前希望一個鐘內完成，最後以約1個鐘7分鐘跑完，「呢兩日開通宵，所以今日都有啲辛苦，最後1K feel到氣管收縮。」Mandy又話休息一陣飲杯咖啡，中午要為主演新戲《不是你不愛你》謝票。

麥子樂同吳嘉禧孖住跑10k，佢哋話冇瞓覺，仲唔夠時間練習，好彩都順利完成。完成10K嘅仲有梁釗峰、黎展峰、霍啟剛同郭晶晶等，想知更多？入嚟睇足本訪問片啦！